Mana’o Papalagi i ‘ele’ele o Samoa – ia umia sa’oloto

Tagata’ese ‘Ailililo 3. – Matā’upu 1.

Translated by Lauano Ati Ilaoa

O le mamao e sefulumaleono kilomita i sisifo ole Malaevaalele Fa’alevaomalo i Faleolo, o lo’o iai se motu e lima kilomita fa’atafāfā lona telē. O Apolima, o se motu fa’a’ofuofu i totonu o le gutu o se maugamū, e ta’oto i luga o se papama’a e 100 mita le loloto ae 18 kilomita le umi, o loo feso’ota’i ai motu autū e lua o Samoa, o Savaii ma Upolu. E leai se a’au fa’ata’amilo e puipui ai lenei motu, ona e itiiti, e le o se motu matua.E toa 70 le aofai o tagata e nofomau ai i Apolima. O latou fale e i totonu ole gutu ole maugamū, e fa’alagolago lo latou tausiga i le sami ma la’au toto i fa’atoaga. O le uiga ole igoa ole motu o ‘Apolima’, ole ‘fa’amaopoopo mai ile lima’, e atagia ai le agaga ole talimalō mo tagata e afio mai ma tala-a’ao mai, e ui ina ole faitoto’a e tasi e ulufale ai i totonu ole motu, e leoina e se ava galuā ma se maoa’e tele. O le aso 5 o Setema ile 1888, sa molimauina ai le iai ole manuao Siamani e igoa ole Adler ile gataifale fa’afesagai tonu ma le ava e ulufale ai va’a i totonu o Apolima.

Apolima. Pic Michael Field

O le tolu masina muamua atu, sa fa’au’uina ai le alii e suafa ia Feleti Viliamu Lolesoleni (Friedrich Wilhelm Hohensollern), 29 tausaga ole soifua, e fai ma Kaisa Viliamu II (Kaiser Wilhelm II), ole Emeperoa ole Nofoaiga e Lua, ole Kaisalika o Siamani. Sa naunau a na faufautua ma sui aloaia o lona Malo ina ia latou pulea Samoa, o atumotu e tusa ma le 15,700 kilomita le mamao i le itu saute o Siamani, ma fai ia atumotu ma vaega o le Kaisalika o Siamani. O le manuao la ole Adler ma lona auva’a e 133 fitafita ma lo latou iai i Apolima, o se vaega lea ole fuafuaga e fa’amautū ai le pulega a Siamani o Samoa. Peitai, e tasi le fa’afitauli sa ono tuta’ia ai lea fa’amoemoe; o Mata’afa Iosefo lea.